बुटवल । लुम्बिनी प्रदेश सरकारको आगामी आर्थिक बर्ष २०८०÷०८१ को नीति तथा कार्यक्रममाथि सोमबारदेखि छलफल हुने भएको छ ।
आज बसेको प्रदेश सभाको बैठकमा सभामुख तुलाराम घर्तीले नीति तथा कार्यक्रममाथि छलफलका लागि सोमबारदेखि तीन दिनको समय निर्धारण गरिएको जानकारी गराएका हुन् ।

नीति तथा कार्यक्रममाथिको छलफल यही जेठ ३१ गतेसम्म चल्ने छ । प्रदेश प्रमुख अमिक शेरचनले यही जेठ २६ गते प्रदेशसभाको बैठकमा नीति तथा कार्यक्रम प्रस्तुत गरेको हो । आइतबारको बैठकमा नीति तथा कार्यक्रम प्रस्तुत गरेकोमा प्रदेश प्रमुख शेरचनप्रति धन्यवाद प्रस्ताव सर्वसम्मतले पारित भएको छ । धन्यवाद ज्ञापनको प्रस्तावकमा नेकपा माओवादी केन्द्र संसदीय दलका नेता जोखबहादुर महरा र समर्थकमा नेपाली कांग्रेसका प्रमुख सचेतक जन्मजय तिमिल्सिना रहेका थिए ।

लुम्बिनी प्रदेश सरकारले प्रदेशलाई आत्मनिर्भर, समृद्ध र समुन्नत बनाउन रणनीतिक प्राथमिकतामा केन्द्रीत हुने गरी कार्यक्रम सञ्चालन गर्ने गरी नीति तथा कार्यक्रम प्रस्तुत गरेको छ । प्रदेश सरकारद्वारा प्रदेशसभामा प्रस्तुत नीति तथा कार्यक्रममा कृषि, पर्यटन, भौतिक पूर्वाधारर स्वास्थ्य जस्ता विषयलाई प्राथमिकतामा राखिएको छ । नीति तथा कार्यक्रममा यसअघिका सरकारले अगाडि बढाएका कार्यक्रमलाई निरन्तरता दिइएको छ ।